Bosanski
Ando than Muhašinovići paša Visoko dživisaren paša 20 romane familijengo. Khonik lendar nane piro ćher, thaj pala cira vakto dživinen ande stambene objektura save ćherutne si avri BiH. Numaj, kana ćherutne irisaren, lenge podstanura e zuralipesa musaj te džan avri e ćherendar. Gova familije si gadija mukline pe korkorre peste.
Jekh e manušendar save e pire familijasa džuvdisarel pale gasavi sudbina e govenca 20 familijenca andare Muhašinovići si Mustafa Husejinović. Vov si o dad pala štar cikne čhavore, e savendar si numaj jekh muršikano čhavo kataro 7 bršengo savo džal ando dujto klaso ande fundeski škola.
Familija Husejinović nikana naj sesa-la piri phuv thaj piro ćher. E bršenca von dživisarde ande kamp- ćherende, jal bilegalnikano ande mukline ćherende. O džuvdipe ande gasavi situacija si bizo paj thaj struja. O paj maladel-pes pe majpašuno xajing, thaj kana avilen šudro vakto thaj kana bršind vi o jiv peren von andren ande limene kamp-ćhera. Mustafa e bršenca marel te lenge čhavoren ačhilen numaj saste thaj džuvinde, a sasto lengo džuvdipe, džal-pe numaj ande varagači kvadratne metrura uzo trin pherdebršenge manuša.
–Mo čhavo džiko gova brš našti te džal redovno ande škola. Sasa melalo thaj but droma irisarda ćhere andari škola kaj vov haćarda džungale šeja e averendar sikavnendar, vi averendar. Pe najisipe pala raji Ugarak vi Udruženje “Budi mi prijatelj”, mrni familija ka ačhel ande džuvdipe. Dži akana, Udruženje – Amalipe ažutisarda amen pala čhavorengo sastipseko ažutipe, te andren ande škola thaj pala man i bući. Anglal duj čhonura astardem te ćerav bući ande Prevent Leather ande Visoko. Mrno najisipe e gova manušende našti te ramosarav. Pala man thaj sar pala sako manuš, majbarikano si sastipe pala leski familija thaj džuvdipe savo trubuj te dživisarel – vaćarda Mustafa.
MARIPE
Maripe pala goja familija astarda anglal duj bršengo. Medijatorka andare Udruženje građana Omladinska romska inicijativa „Budi mi prijatelj“, Biserka Halilović, angluno ažutisarda e familijaće Husejinović pala sastipesko ažutipe pala čhavoren, thaj athoska pala andripe ande škola. Odolese so voj ažutisarda, o čhavo adjive džal ande fundeski škola thaj athoska 5 bršengo vov si-les sastipesko arakhipe thaj naknadno vov djelo ande škola.
Athoska but mangipengo, apelengo thaj inicijativendje koring bare institucijende vi but negativne irisaripende, Biserka ćerda o kris the phučhel pala ažutipe pala goja familija pe aver drom.
Voj ćerda o kontakto koring Mjesna zajednica, thaj ćerda o kontakto e Meldinasa Ugarak, savi si zastupnica ande Skupština ZDK, savi si ande maripe pala ažutipe pala goja familija thaj lako privremeno bešipe.
–Mrno fundesko udžilipe sar zastupnica ande Skupština ZDK si pharipe pala sako dženo. Haćarav kaj i bući savi ćeren sa alosarde predstavnikura trubuj te džal koring lačhipe pala sako forutno thaj forutni. Majbut trubuj te ćeren bući koring marginalizovane khetanipende e forutnende thaj odolese dijem o kris te ažutinav– vaćarda Meldina Ugarak.
Athoska 6 čhonengo e pharipesko pala bešipesko rodipe, Ugarak vi Halilović resle te roden bešipe pala familija Husejinović. Ugarak dija o kris te ažutinen e lovenca kana trubuj te poćinen kirija, thaj e govesa UGORIV “Budi mi prijatelj”, ažutisarda e bućasa pala 20 Romen ande lokalnikani firma Prevent Leader ande Visoko, maškar lendje sasa vi Mustafa.
But themutnikane dokumentura ande Bosna thaj Hercegovina mothoven sar bešen e Roma save si-len bešipe thaj baro džindo e bućarne Romen thaj Romnjen, thaj gova naj si o čačipe e čače situacijasa. Amalipa thaj jekhore džene but droma rode ažutipe e bare institucijendar, numaj von dži akana resle ažutipe e avralutnikanendar organizacijendar pala ćhereski adaptacija, jal pala sanacija pala varese objektura.
Pe pašimata ande Foro Visoko, dži akana na ćerde bući direktno pala stampeno – bešipesko ažutipe odolese so kate nane vodji e but manušendar – akterendar.
