Bosanski
Biš bršengo, Gani Spasoli andaro Sarajevo dživisarel bizo personalne dokumentura thaj našti te mothovel lesko identiteto. Čačipe si kaj, te tumen naj si personalno dokumento, nane o šajipe pala čačipengo astaripe, itakaj si o čačipe savo dija ustavo, krisipa, but konvencija thaj deklaracija, thaj savo ande normalne pašimata si les sako dženo pe bijandipe.
Gani bijanda pe Kosovo, ande nakhli Jugoslavija, e familijasa avilo ando Sarajevo kana sas les cirreder deso jekh brš. Odolese so naj les prijavnica / dokumento pala džuvdipe ande Sarajevo, jekhorro dokumento savo sas les sasa lesko bijandimasko lil thaj pe anglunipe sastimasko lilorro pe savi, pala varegači bršengo, xasarda o čačipe.
– Bršenca zumavdem te ćidav dokumentura sar te astarav čačipe pe themutnipe. Andegova, von rode mandar but mothodipa te ćidav thaj gova sasa but pharo thaj sako duj-trin čhona, avilo negativno atveto – mothodel gova 37-bršutnengo.
Problemo te astaren BiH themutnipe, aver dženura e familijatar Spasoli naj sas, numaj Gani thaj lesko phureder phral. Odolese so naj sas personalna karta sar fundesko identifikacijako dokumento, Gani na phiravda pe ulica, pala pe pala mizmeri thaj ande raćako sahatura.
– Daradem te džav avri, daradem e paćardenadar. Kana nakhel 17 sahatura, na manglem te džav avri e ćherestar. Majanglal ćerdem bući pe auto pijaca thaj ćidem sekundarne sirovine. Kana paćarde astarde man, pala kontrola me dijem mrno bijandimasko lilorro, odolese so gova sasa mrno jekhorro dokumento. Na paćavde mandje. Paša mande sajekh sasa mrni dadeski kartica savi mothovel kaj si mo dad o maripesko invalido, thaj gova dijem e paćardese. Von aćhavde man but droma džiko tranda minutora, thaj mukle man, odolese so nikana na ćerdem došale buća /krivična djela – vaćarda amaro vorbako manuš.
Čačipesko inćaripe kataro Udruženje “Vaša prava BiH”
Ando januaro amen ćerdam o teksto Ka avel apatrido: Kana ni jekh them na mangel tut sar piro themutno, ando savo o čačipesko timo kataro Udruženje „Vaša prava BiH“ vaćarel katare aktivnosti pala mapiranje e dženura bizo identifikacijake dokumentura thaj kataro proceso pala ažutipe pala e dženura save trubuj len. Gani Spasoli sasa o dženo ando riziko e apatrijadatar, thaj lačhi bući pala lesko problemo ćerda gova Udruženje „Vaša prava BiH“, kaj Gani korkoro dželo thaj roda ažutipe pala pes.
– Jekh manuš dija vorba kaj kate si udruženje savo ažutil e dženurendje te astaren personalna dokumentura. Dželem ande „Vaša prava“ thaj manglem te rovav. Von astarde mrno problemo sar lengo slučajo. Vaćarde kaj i dej thaj o dad trubuj te avel te den punomoćo, ćidam sa dokumentura save si amen, lendje bijandeske lilorra thaj uvjerenjura pala themutnipe thaj aver, thaj pala proceso pala mrno themutnipe amen ažućardam paša duj bršengo – mothovel Gani.
Odolese so Ganijeske duj čhavore naj len o upiso, jal naj len matično džindo buteder deso trin bršengo, Udruženje „Vaša prava BiH“ ažutisarda pala gova problemo. Sar bi o statuso pala goja familija Spasoli avilo gato, ačhilo o slučajo pala Ganijeski rromni, savi si srbijaki themutni, thaj problemo pala BiH themuntipe ćerek so naj la potvrda pala legalizacija pala familijako stambeno objekto.
Nevo, maj šukar džuvdipe
Kana gatisarda themutnipe thaj astarda personalna karta, Gani astarda te dživisarel nevo džuvdipe bizo daravipe thaj pharipe kaj e paćarde šaj te ačhen les. Vov džangla kaj akana šaj te astarel piro čačipe pala normalno džuvdipe sar sako manuš.
– Kana astardem personalna karta, sigo astardem bući ande jekh firma savi ćerel bući e telekomunikacijasa. Akana si mi plata thaj aver love pe mrno bankovno računo. Kana astardem personalna karta, gatisardem vozačko ispito – barikano del vorba Gani thaj lundjarel kaj akana but udara si putarde pala les.
Kana džanel kaj vareko hi les gasavo problemo sar vov angla, Gani mothodel leski paramiči, lesko slučajo thaj sikavel o drom koring Udruženje „Vaša prava BiH“ sar organizacija savi e čačimasa ažutinel e gova problemesa.
Odolese so džanel kaj naj sesa o šajipe pala leski edukacija thaj odolese naj les lačhi bući, Gani akana del zuralipe pala leske čhavore te džan ande škola. Pala les majlačhi si leski ćhej savi si sikadi ande Maškarutni škola pala pašimata thaj kašesko dizajno ande Sarajevo.
(portal-udar.net)
