Jasmin Ramić: Ando ringo mothodem so si “romano ilo”

5464
Jasmin Ramić

Jasmin Ramić, majpindžardo sar  “Lavesko ilo”, si o dženo ande Kik boks klubo “Panter” andari Bijeljina.   Pire zuralimasa thaj barikane tehnikasa, gova terno Rom andari Bijeljina putarel ila e publikaće. O “Panter” na astarel e love e Forestar Bijeljina thaj ćerel bući bizo sponzorura, numaj Jasminesko trenero durder del zuralipe pala karijera pala gova terno thaj talentovanikano  borco.   Krzo leski karijera, Jasmin marda-pes ande avrečhende kategorijende thaj si-les o paćape te ćeren boks vi ande amaternikane gadija vi ande profi maripende ande K-1. 

Ande xarno vaćaripe, Jasmin mothoda amen sar sa gova astarda, so si pala les o ringo thaj save si leske planura. 

So si pala tute kik boks thaj sar sa gova asarda?

-But terno muklem škola… Kana gatisardem oktoto klaso avilem korkorro.  Mardem korkorro krzo mo džuvdipe.  Kana muklem škola mo ikalipe rodem ande sporto, a gova si kik boks savo paruvda mo sasto džuvdipe.  Kana avilem 15 bršengo mardem sar čačo lavo! Na istardem vareso familijako inćardipe, numaj mo trenero sasa mo amal, vareko kon sasa mo motivatoro thaj sa so trubuj pala mrne lačhe rezultatura.  Sar junioro, sesa-man 50 maripen thaj but medaljura.

Tu vaćardan kaj o kik boks paruvda ćo džuvdipe.  Avile vi phare momentura kana gindisardan te mukles gova?

-Va, avile vi phare momentura ando džuvdipe…  Uzo mrne lačhe rezultatura, na avilo o šajipe te dživinav e govestar sportestar.  Astardem te ćerav poljoprivreda thaj ande gova momento gindisardem kaj si gova majlačho ćhinavipe pala man.  Athoska trin bršengo e ačhalipesko, mrno trenero Dimitrije Jovanović  akhardo Rox,  vaćarda mansa thaj pale dav andre ando ringo kaj pale dav mo kamipe ando sporto thaj kaj maladivav- pes.  Astardem te ćerav polohko thaj pe angluno turniro athoska iripe, astarav angluno than maškare but lačhe borcura.  Alav si kataro BiH Prvenstvo savo avilo ando Sarajevo ande K-1 disciplina, kaj astardem sumnakuni medalja e savensa astardem o čačipe te džav pe themesko prvenstvo.  Po bibaxtalipe, na djelem odolese so naj sesa-man love.  Naj sam amen pe Foresko budžeto.  Sasto lovesko pharipe si pe trenero savo mora te ćidel love korkorro – kataro gatipe džiko dromaripe, sa…

Savo maripe sasa majzuralo ande ći karijera?

– Avile but maripa thaj sa avile but phare thaj ni cirra lahke.   Numaj, e sa maripendar kate si jekh ande savi ande agoresko momento ćhinadem te avel paruvipe ande Čedosko mečo thaj kaj sesa-man cirreder deso 74 kg kana dijem andre ringo.  Sa ande sa, te ćeren trin rundura e Čedonsa TDI Pantićesa, naj si cikno šej ande pherdi sportaki dvorana “Borik” ande Banja Luka prdal pe leske manušen ande publika.  Kon icirra džanol so si gova sporto, džanol so me vaćarav thaj so si kaj me astardem gova mečo.  But bare borcura na mangle gova so me astardem, pandž lendar.

Angluno mečo trubujem te ćerav e cirra zurale borcasa Erikosa Buzasa, thaj na ćerdem gova thaj astardem e but zurale borcasa savo naj sesa-les protivnikura džiko agoresko momento.  E govensa mothodilem kaj šaj te dav andre ando ringo e sakonesa.  Ande gova mečo sasa mo peravipe ande trinti runda, numaj gova sasa mi motivacija te ćerav gova durder.

Mothodem so si romano ilo! Na alosarav pritivnikura, sa paćav, thaj ando ringo džav džiko agor.  Kana dikhen amare uslovura thaj uslovura ande save von ćeren gatipe, me sem buteder deso ćajlo.

Gači si o kik boks pharo sar sporto?

-Itakaj si o kik boks sar vi sa maripeske džungalipa phare, kana des gindo pala o treningo, fizičko gatipe, pala man si gova sporto anti-stres terapija, odolese so ažutisarda man te astarav na numaj fizičko zuralipe deso vi gođako zuralipe.  Pale gasavo, krzo sporto kana gatisardem profesionalno mečo, ćerav varese love so del mandje o zor te ćerav zuralendar.  Te me na ćerav treningo, naj sem sigurno kaj me šaj normalno te dživinav.

Si tut varesi bičhaldi vorba pala terne Romen thaj Romnjen?

-Angluno so ćerav rigate si te ćeren edukacija.  Amare phure trubuj te aven pe lačhe jakha e čhavorende thaj te ćeren lendje sama gaći si barikani edukacija.  Sar primjero, na astardem inćaripe e mrne dejatar thaj dadestar thaj mange si pharo so na djelem ande škola.  Dujto šej – e savorende dav vorba te ćeren sporto, odolese so ando sporto majlačhe sikljoven te paćaven avere, te aven saste thaj zurale krzo džuvdipe.  Mrno gindo si kaj savore terne trubuj te ćeren sporto.  Amen Roma sam but talentirani thaj kana e govestar talento cirra džal e čače manušenca, kate si rezultatura.

Mrne anglune reslipa ando džuvdipe si pherde, a gova si mrni familija savi si pe angluno than, si-man ando momento trin čhavore thaj baxtalo sem manuš.  Dujto reslipe si te ćerav lačhe rezultatura ande maripeske sportura, vi pe majlačho drom te mothovav pire Roma kaj manuša si-len o šajipe te dikhen gova dujti rig, kaj amen sam bućarno narodo savo paćaven savore, thaj mangen te aven palegasave e savorenca.

(portal-udar.net)