Priština: E Romenge čačipa durder pherde pala implementacija

1692

Participantura pe štarto Romengo Samito pala Zapadno Balkano, savo sasa ande Priština  21. thaj 22. novembro, den jekhetani vorba te si maripe pala e Romengi handuki diskriminacija baro phučipe pala lačheder situacija kaj Roma džuvden, sar thaj pala reslipe pala sa aver mjerura save phuvja ande Balkano thaj Evropaki unija ćeren pala lačheder situacija ande romano amalipe.

Samito sasa istardo uzo loćharipe Civil Rights Defenders (Arakhavne forutnenge čačipa), savi si biprofitnikani organizacija pala manušvalikane čačipa. Pe Samito sasa paša 100 participantura andari 40 organizacije save avile andari 10 phuvja.

Senada Sali, pravnica ande Evropako centro pala e Romenge čačipa (ERRC) savi bešel ande Budimpešta vaćarda kaj resipe pala gova Samito si kaj sako brš o Samito dikhel pala reslipe e umalatar pala e Romenge čačipa.

„Amen mangas te dikhas so reslam, so na reslam, thaj o drom pe savo romane aktivistura mothoden so ka ćeren ando avutno brš. Samito si-les o fokuso pe phuvja pe Zapadno Balkano odolese so si-amen sarani historija, sarano zumadipe, thaj pe gova drom šaj, pe lahko drom, te agorisarel varese phučipa pala e Romen“, vaćarda Sali pala Udar.

Pale gasavo, jekh e panelisto e gova Samitesko sasa o direktoro pala Evropake Arakhavne forutnenge čačipa Goran Miletić, savo mothoda kaj si majbaro resipe pala gova Samito te paruven peske zumadipa thaj te dikhen so šaj te paruven.

„ Trubuj te bajroven e Romengi inkluzija, te irisaren pe phučipa te li vlade ćeren vareso pe gova plano, so šaj civilno amalipe te ćerel lačheder deso so si džiko akana ćerdo“, vaćarda Miletić thaj dija mothodipe kaj kote si pharipa ande implementacija pala vadžaj adaptime strategije thaj krisipa.

Sakibe Jašari pala Evropako Savjet/Turvinjipe pala Kosovo, vaćarda te bi paćavena o krisipen, na bi avela trubujipe pala khanči aver.

„Sa dokumentura, strategije save si ćerde pe centralno levelo, thaj save si ande implementacija pe lokalno levelo, naj si sajekh ande korelacija. E amalipende ande save amen ćeras gova adaptime strategije, dokumentura thaj planura, na den love pala implementacija“, Jašari dija agoreski vorba.

Angluno Romengo Samito pala Zapadno Balkano, sasa 2015. brš te den akharipe/ sama pe anticiganizmo thaj lesko zuralipe, sistematski diskriminacija thaj ćhinavipe e Romenge manušvalikane čačipa ando regiono, thaj te akharel vladura e phuvjende pe Zapadno Balkano te ando sasto čačipe ćeren maškarthemeske standarde pala manušvalikane čačipa.

(portal-udar.net)