Bosanski
Krzo projekto „Platforma za dijalog sa romskim zajednicama“ / „Platforma pala dijalogo ando romano amalipe“, Asocijacija mladih Roma „AKSIOM“ / E terne Romengo asocijacija „Aksiom“ pe direktno drom anel informacije kataro Romengo trubujipe, thaj ando pala gasavo vakto Asocijacija putarel o than pala idejura sar manuša, sar amalipe šaj te ćhinen problemura thaj sar te arakhen institucije andre pala problemengo ćhinavipe.
Pala gova problemo sasa o dijalogo e manušenca save bešen ando loglipe Kuprešani ando Jajce. Problemura e savenca maladilen e Roma thaj Romnja ando gova loglipe si buteder. Kate nane komunalna infrastruktura, paj, struja, kanalizacija, kate si bari diskriminacija thaj gova problemura si numaj varegaći e problemendar.
Thanutne ande Kuprešani naj-len nisavo čačipe
Djeni andi E terne Romengo asocijacija „Aksiom“ , Niza Ramić, phenel kaj si diskriminacija pe nacionalno fundo sako djive kate ando lengo thaneste.
„Andar nacionalnosti naj-amen andripe sar vi avere. Kana si-amen gatisardi škola sar avere, na den amen bući “, phenel Niza Ramić.
Koring gova manušende mothodipe, ando Jajce na ćeren varesi sama pala čore manuša.
„Me ćerdem kontakto savorenca, e savore institucijenca, savore mothoven kaj naj-man nisave čačipa“, phenda Tahira Ramić andaro gova loglipe.
Andar melalipe Roma thaj Romnja“imuni pe korona viruso”
Ando dijalogo e manušenca andaro gova loglipe amen vaćaras sar pandemija korona viruso ćerda pe lengo džuvdipe. Irisaripa avile sar pale gasave. Sar von phenen, nakhlo brš sasa but bilačho pala savore, thaj upral sa naj – sasa o šajipe ni pala cikno therdipe.
But lendar phenen kaj o love pala xape anen e mangipenca pe dromendar thaj kaj odolese ladžavo se lendje, numaj kate naj len aver drom pala džuvdipe.
Ande zurali pandemija kataro lokalne vlasti si-len bilačho zumadipe.
„Kana amen phučas pala vareko ažutipe, jal pala higijenska sredstva jal pala parvaripeske -xapeske paketura von vaćarde kaj o viruso astarda maškar amende, andar amaro melalipe thaj kaj amen našti te aven zaraženi – nasvale, odolese so amen andam o viruso “, phenda Niza Ramić.
Jekhethane šaj ćeren pala e problemengo ćhinavipe
Thaneske manuša ando loglipe Kuprešani paćaven kaj lenge problemura šaj te aven ćhinde thaj kaj si lokalne institucije udžile te ćeren pala problemengo ćhinavipe.
Von haćaren kaj numaj jekhethane šaj te ćeren pala e problemengo ćhinavipe. Gova problemura si kate ande gova amalipe angla deš brš.
Sar majbarikano agoresko alav athoska dijalogo ande Kuprešani, šaj te bičhalas jekhethani vorba kaj numaj jekhethano amalipe šaj e reslipesa te ćeren paruvipa. Djenura andaro AKSIOM nakhlo kurko ćerde dikhipe ande Kuprešani vi romane amalipa ande Kakanj thaj Bugojno.
(Portal Udar)
