Athoska so gatisarda Medicinaki škola, Sanja Salešević (26) andaro Prijedor, na ćerel duje gindipe pala školako / edukacijako lundjaripe. Voj astarda Fakulteto pala sastipeske studije pe Panevropako univerziteto“Apeiron”, pe departmento savo si les o than ande opština Nevo Foro/ Bosanski Novi.
Sevepo so alosarda gova zanimanje / bući si lako mangipe te ažutinel avere, odolese so, sar voj phenda,“džanglipe kaj ažutisardem avere, ćerel man baxt thaj mo ilo si pherdo”.
Sanja gatisarda diploma 2017. brš thaj astarda akharipe sar vuči medicininaki phen. Voj ćerda thaj gatisarda pripravničko vakto thaj dži akana ćerda bući numaj ando jekh phuripesko ćher, ando raćako vakto thaj bizo prijavnica.
– Sar me džanav, avere dženura e gova edukacijasa rode bući. Šaj te avel kaj naj man gova baxt, odolese so manuša si len anglakrisipura koring Romendje. Gindisaren kaj Roma naj len o kadiripe pala bući thaj kaj na manglen te ćeren bući, gova si pale vi kana gatisaren fakulteto – mothodel Sanja.
Athoska buteder bršendje zor pala edukacija, bizo šajipe te rodel bući, normalno si kaj sako dženo astarel te avel bi motivacija. Gadija si vi pala Sanja. Odolese so naj la o šajipe te rodel bući ande struka, voj ćerda rudjipa pe but aver pozicija, numaj bizo reslipe.
Sar pe gova slučajo situacija si pale gasavi pala savore, e Romendje edukacija jal bizo edukacija si bari kritika savi ćeren sa aver manuša, save but droma phenen kaj Roma si bange pala čoripe. Amen džanen sose edukacija na ćerel o džuvdipesko kotor pala Romen. Sanja džanel so si edukacijsko barikanipe, numaj voj džanel kaj o amalipe ćerel kritika koring Romendje andothan te del o šajipe pala bizobućarne terne Roma thaj Romnja.
– Šaj te avel kaj gova so me vaćarav si pharo thaj dukhado numaj te dikhen e Romengo bizobućarnipe ande BiH na dikhav sose trubuj edukacija, numaj dikhav kaj trubuj te džan ande škola. Kana na džan ande škola, aver phenen kaj Roma si o narodo savo na mangel te ćerel edukacija, thaj kana gatisaren škola thaj fakulteto, naj len o šajipe pala bući– vaćarel Sanja.
Odolese so si BiH o them savo si les funkcija pe nacionalne kvote pala bućarnipe, Sanja naj la o šajipe te astarel bući sar nacionalnikani minoriteturengi peravni. Gova si barikano te dikhas palpale odolese so si Roma majbaro thaj majmarginalizirikano minoriteto, thaj odolese so ande sa opštine si mizerno džindo e Romendje save ćeren sajekheski bući.
– Čačo si, dozačardem kaj šaj te astarav prednost pala bući odolese so sem Romni, odolese so pe medija šaj te ašunas paramiča e bućarnipese pala Romen, numaj dikhipe si aver, gova si numaj paramiča savi naj la o djelo – mothoda Sanja.
Katari edukacija džiko bućarnipe – diskriminacija
– Avile but situacija kana aver čhavore na mangle te ćhelen mansa thaj xasavde pe mande odolese so sem Romni. Odolese, naj avel man sajekh lačho te dav vorba kaj sem Romni. Manuša astaren te ćeren anglakrisipa angla deso pindžaren man– astarel Sanja vorba kataro školako vakto.
Džuvdipe e anglakrisipenca lundjarel kataro školako vakto thaj trajil džiko adjive kana bizo reslipe zumavel te rodel bući. Itakaj oficijelno našti te das vorba, jekh gova ciripe ande bijandimasko lilorro ćerel sudbina pala bućarnipe.
– Kana dav dokumentura pala bući, dav vi mrno bijandimasko lilorro kaj romasarel kaj si man rromano nacionalnost, so si, šaj te avel, sevepo so na akharde man pe intervju pala bući – lundjarel Sanja.
– Te si tut kalo muj, dikhen tut sar si kate te manges, a naj te rodes bući e savensa manges te astares love pe paćivalo drom pala džuvdipe pala piri familija– vaćarel voj.
Odolese so kate si o šajipe pala medicinake bućarne ande Njemačka, Sanja akana džal pe čhibako kurso thaj akana si pe levelo B1. Numaj, voj dozačarel te rodel bući ando piro foro, mangel te ažutinel e phenaće, e dadese thaj e dejaće save si bibućarne sar vi voj si.
(portal-udar.net)